ଇଚ୍ଛାପୁରରେ ନୂତନ ମନ୍ଦିର ପ୍ରତିଷ୍ଠା

ଚିଲିକା: ଚିଲିକା ବ୍ଲକ ଅନ୍ତର୍ଗତ ଇଚ୍ଛାପୁର ଗ୍ରାମରେ ଗୁରୁବାର ଦିନ ତାରେଣୀ ଠାକୁରାଣୀଙ୍କ ନୂତନ ମନ୍ଦିର ପ୍ରତିଷ୍ଠା କରାଯିବା ସହ ମା’ ଙ୍କ ବିଗ୍ରହ ସ୍ଥାପନ କରାଯାଇଛି । ଏହି ଉପଲକ୍ଷେ ମଙ୍ଗଳବାର ଦିନ ଅଙ୍କୁରାରୋପଣ କରାଯାଇଥିଲା। ବୁଧବାର ଦିନ କଳସ ଯାତ୍ରା, ସୂର୍ଯ୍ୟପୂଜା, ଗୋପୂଜା, ଶାଲଦି ପୂଜା, ଦେବା ଦେବୀ ଆମନ୍ତ୍ରଣ, ଅଗ୍ନି ସଂସ୍ଥାପନ ଓ ଆହୁତି ପ୍ରଦାନ କରାଯାଇଥିଲା। ଗୁରୁବାର ଦିନ ମନ୍ଦିର ପ୍ରତିଷ୍ଠା, ମନ୍ଦିର ରତ୍ନ ମୁଦ ସମାପନ କରାଯିବା ପରେ ମା’ତାରେଣୀଙ୍କୁ ଗ୍ରାମବାସୀମାନେ ବର୍ଣ୍ଣାଢ଼୍ୟ ଶୋଭା ଯାତ୍ରାରେ ଗ୍ରାମ୍ୟ ପରିକ୍ରମା କରାଇ ମାଘସ୍ନାନ ପରେ ମା’ଙ୍କୁ ସିଂହାସନରେ ସ୍ଥାପନ କରିଥିଲେ । । ଉକ୍ତ କାର୍ଯ୍ୟକୁ ପଣ୍ଡିତ ଦିଲ୍ଲୀପ କୁମାର ସାମନ୍ତରାୟ, ପଣ୍ଡିତ ସୀମାଞ୍ଚଳ ମହାପାତ୍ର, ପଣ୍ଡିତ ସତ୍ୟ ନାରାୟଣ ଦାଶ, ପଣ୍ଡିତ ସୁବାସ ଚନ୍ଦ୍ର ତ୍ରିପାଠୀ, ପଣ୍ଡିତ ଗୋଲେଖ ଦାଶ ଓ ପଣ୍ଡିତ ଅଶୋକ କୁମାର ଦାଶ ପ୍ରମୁଖ ବ୍ରାହ୍ମଣ ସାମନ୍ତ ମାନେ ସମ୍ପାଦନ କରିଥିଲେ। ମନ୍ଦିର ପ୍ରତିଷ୍ଠାର ପୁରୋଧା ଭାବେ ସସ୍ତ୍ରୀକ ରବୀନ୍ଦ୍ର ନାଥ ପ୍ରଧାନ ଉପବେଶନ କରିଥିଲେ। ମନ୍ଦିର ପ୍ରତିଷ୍ଠାରେ ଇଚ୍ଛାପୁର ଗ୍ରାମ ସମେତ ଆଖ ପାଖ ଅଞ୍ଚଳର ଶହ ଶହ ଭକ୍ତ ଯୋଗ ଦେଇ ମା’ଙ୍କର ଆଶୀର୍ବାଦ ଭିକ୍ଷା କରିଥିଲେ। ଉକ୍ତ ପ୍ରତିଷ୍ଠାରେ ଯୋଗ ଦେଇଥିବା ସମସ୍ତ ଭକ୍ତମାନଙ୍କ ପାଇଁ ପ୍ରସାଦ ସେବନର ବ୍ୟବସ୍ଥା କରାଯାଇଥିଲା।ଏଥିରେ ଇଚ୍ଛାପୁର ଗ୍ରାମର ସମସ୍ତ ଗ୍ରାମବାସୀ ସହଯୋଗ କରିଥିଲେ।