ବଡ଼କୁଳ ହାଇସ୍କୁଲରେ ସଡ଼କ ସୁରକ୍ଷା ସଚେତନତା କାର୍ଯ୍ୟକ୍ରମ

ବାଲୁଗାଁ : ବଡ଼କୁଳ ହାଇସ୍କୁଲ ପରିସରରେ ବାଲୁଗାଁ ଥାନା ପକ୍ଷରୁ ସଡ଼କ ସୁରକ୍ଷା ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ବାଲୁଗାଁ ଥାନା ଆଇଆଇସିଙ୍କ ନେତୃତ୍ୱରେ ଆୟୋଜିତ ଏହି କାର୍ଯ୍ୟକ୍ରମରେ ବିଦ୍ୟାଳୟର ଶତାଧିକ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ। ଏହି ଅବସରରେ ଆଇଆଇସି ଛାତ୍ରଛାତ୍ରୀମାନଙ୍କୁ ସଡ଼କ ସୁରକ୍ଷା ନିୟମ ବିଷୟରେ ବୁଝାଇଥିଲେ। ହେଲମେଟ୍ ବିନା ବାଇକ୍ ନ ଚଲାଇବା, ରାସ୍ତା ପାର୍ ହେବା ବେଳେ ଉଭୟ ପାର୍ଶ୍ଵକୁ ଦେଖିବା, ମୋବାଇଲ୍ ଫୋନ୍ ବ୍ୟବହାର କରି ଗାଡ଼ି ନ ଚଲାଇବା ଏବଂ ଟ୍ରାଫିକ୍ ନିୟମ ମାନିବାକୁ ସେ ପରାମର୍ଶ ଦେଇଥିଲେ। ନାବାଳକ ମାନେ ଗାଡ଼ି ନ ଚଲାଇବାକୁ ଏବଂ ନିଜ ପିତାମାତାଙ୍କୁ ମଧ୍ୟ ଟ୍ରାଫିକ୍ ନିୟମ ମାନିବାକୁ କହିବାକୁ ଆଇଆଇସି ଛାତ୍ରଛାତ୍ରୀମାନଙ୍କୁ ଅନୁରୋଧ କରିଥିଲେ। ଏହି କାର୍ଯ୍ୟକ୍ରମରେ ବିଦ୍ୟାଳୟର ପ୍ରଧାନଶିକ୍ଷକ, ଶିକ୍ଷକ-ଶିକ୍ଷୟିତ୍ରୀ ଏବଂ ବାଲୁଗାଁ ଥାନାର କର୍ମଚାରୀମାନେ ଉପସ୍ଥିତ ଥିଲେ। ପୋଲିସର ଏଭଳି ସଚେତନତା କାର୍ଯ୍ୟକ୍ରମକୁ ଶିକ୍ଷକ ଓ ଅଭିଭାବକମାନେ ପ୍ରଶଂସା କରିଥିଲେ।