୬୪ ଯୋଗିନୀ ମହୋତ୍ସବର 2ୟ ସନ୍ଧ୍ୟା: ଗୋଟିପୁଅ ନୃତ୍ୟରେ ଦର୍ଶକ ବିମୋହିତ

ବାଲିଅନ୍ତା,୨୭|୧୨:ଓଡିଶା ପ୍ରସିଦ୍ଧ ତନ୍ତ୍ରପୀଠ ୬୪ ଯୋଗିନୀ ପୀଠ ପରିସରରେ ମହୋତ୍ସବ କମିଟି ଓ ହୀରାପୁର ଗ୍ରାମ୍ୟ କମିଟି ଆନୁକୂଲ୍ୟରେ ଅନୁଷ୍ଠିତ ହେଉଥିବା ୧୮ ତମ ଆନ୍ତର୍ଜାତୀକ ୬୪ ଯୋଗିନୀ ମହୋତ୍ସବ ଦ୍ଵିତୀୟ ସନ୍ଧ୍ୟାର ପ୍ରଥମାର୍ଦ୍ଧରେ ଗୋଟିପୁଅ ନୃତ୍ୟରେ ଦର୍ଶକ ବିମୋହିତ l ଏହି ନୃତ୍ୟକୁ ଭୁବନେଶ୍ୱର ଆରାଧନା ଡ୍ୟାନ୍ସ ଏକାଡେମୀର କଳାକାର ଅତି କୌଶଳତାର ସହ ପରିବେଷଣ କରିଥିଲେ l ଯେଉଁଥିରେ ପାଞ୍ଚଦେବୀ ଶ୍ରୁତି, ଦେଖଗୋ ରାଧା ମାଧବ ଚାଲି ଏବଂ ବନ୍ଧ ନୃତ୍ୟ ପରିବେଷଣ ଅତି ଉଚ୍ଚ କୋଟିର ଥିଲା l ଦ୍ଵିତୀୟ ସନ୍ଧ୍ୟାର ଦ୍ଵିତୀୟାର୍ଦ୍ଧରେ କଳାହାଣ୍ଡି ଭବାନୀପାଟଣାରୁ ଆସିଥିବା କଳାକାର ମାନଙ୍କ ଢୋଲ, ନାଶା ତାଲ ଓ ଯୋଡି ମହୁରୀର ସମାହାରରେ ଘୁଙ୍ଗୁରର ତାଳେ ତାଳେ ଏହି ଘୁମୁରା ନୃତ୍ୟ ଶୀତୁଆ ସନ୍ଧ୍ୟାରେ ମନୋରଞ୍ଜନ ଖୋରାକ ଯୋଗାଇଥିଲା l ଏଥିରେ ବୀର ମାନଙ୍କ ବୀରତ୍ୱର ଗାଥା ବୀର ରଶ ଓ ପ୍ରେମର ପରିଭାଷାକୁ ଶୃଙ୍ଗାର ରଶ ମାଧ୍ୟମରେ ପରିବେଷଣ କରିଥିଲେ l ପରେ ପରେ ତୃତୀୟ ପ୍ରସ୍ତୁତୀରେ ଗୁରୁ କୁମାର ଭୀମସେନଙ୍କ ନୃତ୍ୟ ସଂଯୋଜନାରେ ପୁରୀ ନାଚଘର ନୃତ୍ୟାନୁଷ୍ଠାନର କଳାକାରଙ୍କ ଦ୍ୱାରା ଦଳଗତ ଓଡିଶୀ ନୃତ୍ୟ ପରିବେଷଣ କରାଯାଇଥିଲା l ଯେଉଁଥିଲେ ମହାନକବି ଜୟଦେବଙ୍କ ରଚିତ ଗୀତଗୋବିନ୍ଦ କାବ୍ୟରୁ କୃଷ୍ଣ ରସ ଏବଂ ଦେବୀ ଶ୍ରୁତି ପରିବେଷଣ କରିଥିଲେ l କୃଷ୍ଣ ରସରେ ରାଧା କୃଷ୍ଣଙ୍କ ପ୍ରେମ ଲୀଳା ଅତି ନିଖୁଣ ଭାବରେ ପରିବେଷଣ ଦର୍ଶକଙ୍କୁ ବିଳମ୍ବିତ ରାତି ପର୍ଯ୍ୟନ୍ତ ବାନ୍ଧି ରଖିପାରିଥିଲା l ପରେ ଦେବୀ ଶ୍ରୁତିରେ ଦେବୀ ଦୁର୍ଗାଙ୍କ ବିଭିନ୍ନ ରୂପ ବର୍ଣ୍ଣନା ନୃତ୍ୟ ମାଧ୍ୟମରେ ପରିବେଷଣ ବେଶ ମନ୍ତ୍ରମୁଗ୍ଧ କରିଥିଲା l ପରେ ପରେ ପୁରୀ ନୀଳାଚଳ ମାରୁତି ବନାଟି କଳା ପରିଷଦ ପକ୍ଷରୁ କଳାକାର ମାନେ ନିଆଁରେ ବିଭିନ୍ନ ସମରକଳା ପ୍ରଦର୍ଶନ କରିଥିଲେ l ଶେଷରେ ଶୁର ଓ ରିଦିମ ପକ୍ଷରୁ ମେଲୋଡି କାର୍ଯ୍ୟକ୍ରମ ଆୟୋଜନ କରାଯାଇଥିଲା l ଏହାକୁ ସମବେତ ଦର୍ଶକ ଉପଭୋଗ କରିଥିଲେ l ଆଜିର ଅତିଥିଭାବେ ବିଜେଡି ବାଲିଅନ୍ତା ବ୍ଲକ ସଭାପତି ପ୍ରଦୀପ୍ତ ଜେନାମାଣି, ବାଲିପାଟଣା ବ୍ଲକ ସଭାପତି କିଶୋର ଜେନା,ଉପାଧ୍ୟକ୍ଷା ଇତିଶ୍ରୀ ଜେନା, ଯୁବନେତା ମାନସ ନାୟକ, ଗଙ୍ଗାଧର ମାହାରୀ, ଜିଲ୍ଲା ପରିଷଦ ସଭ୍ୟ ଗଙ୍ଗାଧର ମଲ୍ଲିକ, ବିଜୟ ମୁଦୁଲି ପ୍ରମୁଖ ଉପସ୍ଥିତ ଥିବା ବେଳେ ମହାମାୟା ଟ୍ରଷ୍ଟ ବୋର୍ଡର ଟ୍ରଷ୍ଟି ତ୍ରିନାଥ ପରିଡା, ହୀରାପୁର ଗ୍ରାମ୍ୟ କମିଟି ସଭାପତି ରବୀନ୍ଦ୍ରନାଥ ନାୟକ, ସମ୍ପାଦକ ବନମାଳୀ ଦାସ, ମହୋତ୍ସବର ସଭାପତି ସୁକାନ୍ତ କୁମାର ସାହୁ, ଉପସଭାପତି ଅଶୋକ କୁମାର ଜେନା, ସମ୍ପାଦକ କାଳୁ ଚରଣ ଦାସ ପ୍ରମୁଖ ପରିଚାଳନାରେ ସହଯୋଗ କରିଥିଲେ l