୧୪ ଜଣ କଂଗ୍ରେସ ବିଧାୟକ ମାନଙ୍କ ଉପରୁ ନିଲମ୍ବନ ଆଦେଶ ପ୍ରତ୍ୟାହାର ଦାବି ରେ ୪ ଟି ବାମପନ୍ଥୀ ଦଳ ରାଜ୍ୟପାଳଙ୍କୁ ଭେଟିଲେ

ଭୁବନେଶ୍ୱର: ମହାନ୍ ସ୍ବାଧୀନତା ସଂଗ୍ରାମୀ ଶହୀଦ ଲକ୍ଷ୍ମଣ ନାୟକଙ୍କ ଫାଶୀ ଦିବସ ଉପଲକ୍ଷେ ଓଡ଼ିଶା ର ରାଜ୍ୟପାଳ ଡଃ ହରିବାବୁ କମ୍ଭମପତିଙ୍କୁ ୪ଟି ବାମପନ୍ଥୀ ଦଳର ରାଜ୍ୟ ନେତୃବୃନ୍ଦ ରାଜଭବନରେ ସାକ୍ଷାତ କରି ସ୍ମାରକ ପତ୍ର ପ୍ରଦାନ କରିଛନ୍ତି । ସମ୍ମାନନୀୟା ଭାରତର ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୂର୍ମୁଙ୍କ ଉଦ୍ଦେଶ୍ୟରେ ସ୍ମାରକ ପତ୍ର ପ୍ରଦାନ କରିବା ସହିତ ମାନନୀୟ ରାଜ୍ୟପାଳଙ୍କୁ ସ୍ମାରକ ପତ୍ର ପ୍ରଦାନ କରି ସମସ୍ତ ବିଷୟ ଅବଗତ କରିଛନ୍ତି। ରଜ୍ୟର ଆଇନ ଶୃଙ୍ଖଳା ପରିସ୍ଥିତି ରେ ସୁଧାର ଆଣିବା ଦାବି ସହିତ ସଂସଦୀୟ ସଦୀୟ ଗଣତନ୍ତ୍ର ର ସୁରକ୍ଷା ପାଇଁ ମିଳିତ ସଂଗ୍ରାମ ନିମନ୍ତେ ବାମ୍ପପନ୍ଥୀ ଦଳ ମାନେ ଆହ୍ଵାନ ଦେଇଛନ୍ତି । ମହିଳା ସୁରକ୍ଷା ସଂଗ୍ରାମ ପ୍ରତି ବାମପନ୍ଥୀ ଦଳମାନେ ପୂର୍ଣ୍ଣ ସଂହତି ଜ୍ଞାପନ ଏବଂ ସମର୍ଥନ ଘୋଷଣା କରିଛନ୍ତି। ୧୪ ଜଣ କଂଗ୍ରେସ ବିଧାୟକ ମାନଙ୍କ ଉପରୁ ନିଲମ୍ବନ ଆଦେଶ କୁ ଅବିଳମ୍ବେ ପ୍ରତ୍ୟାହାର କରି ବିଧାନସଭା ରେ ସୁସ୍ଥ ଗଣତାନ୍ତ୍ରିକ ବାତାବରଣ ପ୍ରତିଷ୍ଠା ପାଇଁ ଦାବି କରାଯାଇଛି। ଜନ ପ୍ରତିବାଦ ଉପରେ ପୁଲିସ୍ ଦମନକୁ ବାମପନ୍ଥୀ ଦଳ ମାନେ ତୀବ୍ର ନିନ୍ଦା ଏବଂ ପ୍ରତିବାଦ କରିଛନ୍ତି। କଂଗ୍ରେସ ତରଫରୁ ମହିଳା ନିର୍ଯାତନା ବିରୋଧ ରେ ମାର୍ଚ୍ଚ ୨୭ ତାରିଖ ରେ ବିଧାନସଭା ସମ୍ମୁଖ ରେ ସଙ୍ଗଠିତ ହୋଇଥିବା ଶାନ୍ତିପୂର୍ଣ୍ଣ, ଗଣତାନ୍ତ୍ରିକ ଆନ୍ଦୋଳନ ଉପରେ ପୋଲିସ ଦମନ, ଶାରିରୀକ ଆକ୍ରମଣ,ପାଣି ମାଡ଼, ଲୁହାବୁହା ଗ୍ୟାସ ପ୍ରୟୋଗ କରିବା ଏବଂ ନିର୍ମମ ଲାଠି ଚାଳନା ଅତ୍ୟନ୍ତ ଉଦବେଗଜନକ ଏବଂ ନିନ୍ଦନୀୟ ଘଟଣା। ପୋଲିସ୍ ମହାନିର୍ଦ୍ଦେଶକ ଗଣ ମାଧ୍ୟମ ରେ ଦେଇଥିବା ମନ୍ତବ୍ୟ ପ୍ରତିହିଂସା ପରାୟଣ, ଅଗଣତାନ୍ତ୍ରିକ ଏବଂ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ। ପୁଲିସ୍ ନିଜର ଅପାରଗତା ଏବଂ ବିଫଳତା କୁ ଘୋଡାଇବା ପାଇଁ ଏହିଭଳି ଆକ୍ରୋଶ ମୂଳକ ମନ୍ତବ୍ୟ ଦେଇଛନ୍ତି । ଏହାକୁ ରାଜ୍ୟବାସୀ ବରଦାସ୍ତ କରିବେ ନାହିଁ। ରାଜ୍ୟ ତମାମ ମିଳିତ ପ୍ରତିବାଦ ପାଇଁ ଆହ୍ଵାନ ଦିଆଯାଇଛି । ରାଜ୍ୟ ସରକାରଙ୍କ ସ୍ଵରାଷ୍ଟ୍ର ବିଭାଗ ପକ୍ଷରୁ ବିଧାନସଭାରେ ଉପସ୍ଥାପିତ ଶ୍ୱେତପତ୍ର ର ରିପୋର୍ଟ କହୁଛି ଯେ ଓଡ଼ିଶାରେ ମହିଳା ଓ ଶିଶୁ ନିର୍ଯ୍ୟାତନା ଉଦବେଗଜନକ ଭାବେ ବୃଦ୍ଧି ପାଇଛି। ବଳାତ୍କାର,ଦୁଷ୍କର୍ମ/ଗଣ ଦୁଷ୍କର୍ମ, ଆଦିବାସୀ ହଷ୍ଟେଲ ରେ ଛାତ୍ରୀମାନେ ଅବାଞ୍ଛିତ ଗର୍ଭବତୀ ହେବା, ବେଆଇନ ମହିଳା ଚାଲାଣ ( illegal Women Trafficking), ଅପହରଣ, ହତ୍ୟା ଏବଂ ହିଂସା ଭୟଙ୍କର ଭାବେ ବୃଦ୍ଧି ପାଇଛି। ମହିଳା ପ୍ରସଙ୍ଗ ଏକ ସମ୍ବେଦନ ଶୀଳ/ ସ୍ପର୍ଶ କାତର ଏବଂ ଆତ୍ମ ମର୍ଯ୍ୟାଦା ଜନିତ ପ୍ରସଙ୍ଗ ଅଟେ। ରଜ୍ୟରେ ଶିଶୁ, ମହିଳା ଓ ବରିଷ୍ଠ ନାଗରିକ ମାନେ ସୁରକ୍ଷିତ ନୁହଁନ୍ତି। ଚୋରି, ସିନ୍ଧି ଚୋରି, ଡକାୟତି ଏବଂ ସଂଗଠିତ ହତ୍ୟା ଇତ୍ୟାଦି ଜଘନ୍ୟ ଅପରାଧ ନିୟନ୍ତ୍ରଣ ବାହାରକୁ ଯାଇଛି। ପୋଲିସ୍ ବ୍ୟବସ୍ଥା ଏହି ସବୁ ସଙ୍ଗୀନ ଅପରାଧକୁ ରୋକିବା, ନିୟନ୍ତ୍ରଣ କରିବା/ ଅଭିଯୁକ୍ତ ଅପରାଧୀ ମାନଙ୍କ ବିରୋଧ ରେ ପ୍ରମାଣ ଯୋଗ୍ୟ ଅଭିଯୋଗ ଫର୍ଦ୍ଦ ଦାଖଲ କରିବା ଇତ୍ୟାଦି କ୍ଷେତ୍ର ରେ ବିଫଳ ହୋଇଛି । ଅପରାଧ ଏବଂ ଅପରାଧୀଙ୍କ ସଙ୍ଖ୍ୟା ଦିନକୁ ଦିନ ବୃଦ୍ଧି ପାଉଛି । ଡବଲ ଇଞ୍ଜିନ ବିଜେପି ସରକାର ଏହାର ପ୍ରତିକାର ନକରି ପ୍ରତିହିଂସା ପରାୟଣ/ ପ୍ରତିଶୋଧ ପରାୟଣ ହୋଇ ଆନ୍ଦୋଳନକୁ ଦମନ କରିବା ଆର୍ ଏସ ଏସ-ବିଜେପିର ଅଗଣତାନ୍ତ୍ରିକ/ଏକଛତ୍ରବାଦୀ ଚରିତ୍ର କେବଳ ପଦାରେ ପଡିନାହିଁ,ବରଂ ଅଧିକ ସୁଦୃଢ଼ ହୋଇଛି। ସରକାର ଅଧିକ ଏକଛତ୍ରବାଦୀ/ ସୌରାଚାରୀ ହୋଇଛନ୍ତି ବୋଲି ବାମପନ୍ଥୀ ଦଳ ମାନେ କହିଛନ୍ତି । ରଜ୍ୟର ଏହି ଗୁରୁତ୍ୱପୂର୍ଣ୍ଣ ପ୍ରସଙ୍ଗ ରେ କଂଗ୍ରେସ ଦଳର ବିଧାୟକ ମାନେ ବିଧାନସଭା ରେ ପ୍ରତିବାଦ ଆନ୍ଦୋଳନ କରିବା ଯୋଗୁଁ ସେମାନଙ୍କୁ ନିଲମ୍ବନ କରାଯାଇଛି I ଏହା ଅନ୍ୟାୟ, ଅଗଣତାନ୍ତ୍ରିକ ଏବଂ ଅସାମ୍ବିଧାନିକ ଅଟେ । ଏହି ନିଲମ୍ବନ ଆଦେଶ ଆଇନ ବିରୋଧୀ, ଅଗଣତାନ୍ତ୍ରିକ ଏବଂ ସଂସଦୀୟ ଗଣତନ୍ତ୍ର ପ୍ରତି କୃର ଉପହାସ ଅଟେ । ମହିଳା ନିର୍ଯାତନା ଏବଂ ବିପର୍ଯ୍ୟସ୍ତ ଆଇନ ଶୃଙ୍ଖଳା ପରିସ୍ଥିତି ପ୍ରସଙ୍ଗ ରେ ତୁରନ୍ତ ଗୃହ କମିଟି ଗଠନ ହେବା ଜରୁରୀ ବୋଲି ଦାବି କରାଯାଇଛି । ନିଲମ୍ୱିତ ବିଧାୟକ ମାନଙ୍କ ଉପରୁ ନିଲମ୍ବନ ଆଦେଶ ପ୍ରତ୍ୟାହାର କର, ଗଣତାନ୍ତ୍ରିକ ଆନ୍ଦୋଳନ ଉପରେ ପୋଲିସ ଦମନ ବନ୍ଦ କର, ଓଡ଼ିଶାରେ ସଂସଦୀୟ ଗଣତନ୍ତ୍ର ର ସୁରକ୍ଷା ଏବଂ ଲୋକଙ୍କ ଧନ-ଜୀବନ ସୁରକ୍ଷିତ କରିବା ପାଇଁ କୁହାଯାଇଛି। ବାମପନ୍ଥୀ ଦଳର ରାଜ୍ୟ ନେତୃବୃନ୍ଦ ଆହୁରି କହିଛନ୍ତି ଯେ ଗଣତନ୍ତ୍ର ରେ ପ୍ରତିବାଦ ଆନ୍ଦୋଳନ ହେବ ନାହିଁ ତ ଆଉ କ’ଣ କରାଯିବ ? ଜନ ପ୍ରତିବାଦ ପ୍ରତି ସରକାର ସହନଶୀଳ ହେବା ଉଚିତ। ସଂସଦୀୟ ଗଣତନ୍ତ୍ର ରେ ବିରୋଧୀ ଦଳ ହେଉଛନ୍ତି ଗଣତନ୍ତ୍ର ଏବଂ ଜନଗଣଙ୍କ ଜାଗ୍ରତ ପ୍ରହରୀ । ଦଙ୍ଗା, ହାଙ୍ଗାମା, ଦମନ, ପୀଡନ, ଘୃଣା ଭାବନା ଇତ୍ୟାଦି ସଚେତନ ଭାବେ ସଂଗଠିତ କରି ଗଣତନ୍ତ୍ରର କଣ୍ଠରୋଧ ଏବଂ ଜନ ପ୍ରତିବାଦ କୁ ଦମନ ଏବଂ ଭୟଭୀତ କରାଇ ଶାସନ ଚାଲିବ ନାହିଁ। ଓଡ଼ିଶାବାସୀ ଏହି ସମସ୍ତ ଅନ୍ୟାୟ ଓ ଅତ୍ୟାଚାର ବିରୋଧରେ ପ୍ରତିବାଦ ଆନ୍ଦୋଳନ ସଂଗଠିତ କରିବା ପାଇଁ ଆହ୍ଵାନ ଦିଆଯାଇଛି। ଆଜିକାର ଏହି ପ୍ରତିନିଧି ଦଳ ରେ ସି ପି ଆଇ ରାଜ୍ୟ ସମ୍ପାଦକ ଆଶିଷ କାନୁନଗୋ, ସି ପି ଆଇ(ଏମ୍) ରାଜ୍ୟ ସମ୍ପାଦକ ସୁରେଶ ଚନ୍ଦ୍ର ପାଣିଗ୍ରାହୀ, ସି ପି ଆଇ( ଏମ୍ ଏଲ୍) ଲିବେରେସନ ରାଜ୍ୟ ନେତା ମହେନ୍ଦ୍ର ପରିଡ଼ା, ଫରୱାର୍ଡ ବ୍ଲକ୍ ରାଜ୍ୟ ସାଧାରଣ ସମ୍ପାଦକ ଜ୍ୟୋତି ରଞ୍ଜନ ମହାପାତ୍ରଙ୍କ ସମେତ ଜୟନ୍ତ ଦାସ, ବଦ୍ରି ନାରାୟଣ ଦାଶ, ଲକ୍ଷ୍ମୀ ଦୋରା, ଦିଶା ଆଜାଦ୍, ଅନ୍ତର୍ଯ୍ୟାମୀ ସାହୁ ପ୍ରମୁଖ ବାମପନ୍ଥୀ ଦଳର ରାଜ୍ୟ ନେତୃବୃନ୍ଦ ରାଜ୍ୟପାଳଙ୍କୁ ସାକ୍ଷାତ କରି ସ୍ମାରକ ପତ୍ର ପ୍ରଦାନ କରିଛନ୍ତି।ବଲାଙ୍ଗିର ଜିଲ୍ଲା ରୁ ଅନ୍ତର୍ଯ୍ୟାମୀ ସାହୁ ଙ୍କ ରିପୋର୍ଟ୍ l