ଅଳଙ୍କାର ଦୋକାନରେ ଫୁଟିଲା ଗୁଳି

ପାଣିକୋଇଲି: ୧୬ନଂ ଜାତୀୟ ରାଜପଥର ପାଣିକୋଇଲି ପଣ୍ଡା ଅଳଙ୍କାର ଦୋକାନରୁ ବନ୍ଧୁକ ମୁନରେ ହୋଇଛି ଡକାୟତି। ଶନିବାର ମଧ୍ୟାହ୍ନରେ ଜିଲା ଏସପି ମୁଖ୍ୟାଳୟ ବା ଏସପି ଦପ୍ତରର ଦୁଇଶହ ମିଟର ଦୂର ଅଳଙ୍କାର ଦୋକାନରେ ଦିନରେ ଡ଼କାୟତଙ୍କ ଗୁଳିମାଡ଼ରେ ଜଣେ କର୍ମଚାରୀ ସହ ଦୁଇଜଣଙ୍କ ମୃତ୍ୟୁ ଘଟିଛି । ଫେରାର ହେବାକୁ ବସିଥ‌ିବା ରାଜ୍ୟ ବାହାରର ଦୁଇ ଡ଼କାୟତଙ୍କୁ ଲୋକେ କାବୁ କରି ବହେ ଛେଚି ଗୁରୁତର କରି ଦେଇଥିଲେ। ହଜାର ହଜାର ଲୋକଙ୍କ ଗହଣରୁ ଡ଼କାୟତଙ୍କୁ ମୁକୁଳାଇ ନିଜ ହେପାଜତକୁ ନେଇଥିଲେ ହେଁ ସେମାନଙ୍କ ଅବସ୍ଥା ଗୁରୁତର ଥିବାରୁ ମେଡ଼ିକାଲରେ ଭର୍ତି କରାଯାଇଛି। ମିଳିଥିବା ଖବର ମତେ ଶନିବାର ଦିନ ପ୍ରାୟ ୧.୩୦ ମିନିଟ ସମୟରେ ୩ ଜଣ ଡକାୟତ ବାଇକରେ ଆସି ପଣ୍ଡା ଅଳଙ୍କାର ଭିତରେ ପସିଥିଲେ। ଅଳଙ୍କାର ଦୋକାନଟି ଦ୍ବିମହଲାର ହୋଇଥିବା ବେଳେ ଦୁଇଜଣ ଉପରତାଲା ଜଣେ ତଳ ମହଲାରେ ରହିଥିଲେ। ଉପରକୁ ଯାଇଥିବା ଡ଼କାୟତ ମାଲିକ ଅଶୋକ ପଣ୍ଡାଙ୍କୁ ବନ୍ଧୁକ ଦେଖାଇ ଭୟଭୀତ କରି ସୋରୁମରେ ଥ‌ିବା ସୁନା ଅଳଙ୍କାର ଆଣିଥିବା ଥଳିରେ ଭର୍ତି କରି ତଳକୁ ଆସିଥିଲେ । ତଳେଥିବା ମାଲିକଙ୍କ ପୁଅ ଡ଼କାୟତଙ୍କୁ ପ୍ରତିରୋଧ କରିବା ବେଳେ ଜଣେ ଡ଼କାୟତ ତାଙ୍କୁ ଲକ୍ଷକରି ଗୁଳି ଫୁଟାଇଥିଲା। ହେଲେ ଗୁଳିରୁ ମାଲିକଙ୍କ ପୁଅ ବର୍ତିଯାଇଥିଲେ। କୌଶଳ କ୍ରମେ ଡକାୟତ ମାଲିକଙ୍କ ପୁଅ ପଦାକୁ ଆସି ପାଖରେ ଦୋକାନ କରିଥିବା ତାଙ୍କ ଭାଇ ବାବୁଲା ପଣ୍ଡାଙ୍କ ସହ ଅନ୍ୟମାନଙ୍କୁ ଫୋନ କରି ଜଣାଇଥିଲେ। ଏହି ସମୟ ମଧ୍ୟରେ
ଦୁଇଜଣଙ୍କୁ ଛାର୍ଡ଼ ଅନ୍ୟ ଡ଼କାୟତ ଫେରାର ହୋଇଯାଇଥିଲା। ତେବେ ଫୋନ ପାଇ ବାବୁଲା ଓଡି୦ ୫ ଏଏଲ- ୮୧୮୪ ବାଲେନା କାର ଧରିଦୃତଗତିରେ ଆସି ଓଡି୧୭ ଏକ୍ସ- ୭୯୬୫ ନଂ ଆପାଚି ଗାଡ଼ିରେ ଫେରାର ହେବାକୁ ବସିଥିବା ଡ଼କାୟତଙ୍କୁ ଧକ୍କା ଦେଇଥିଲେ। ତଳେ ପଡ଼ିଯିବା ପରେ ଡ଼କାୟତଙ୍କୁ ଘଟଣା ସ୍ଥଳରେ ପହଁଚିଥିବା ଲୋକ ଏବଂ ଅଳଙ୍କାର ଦୋକାନ କର୍ମଚାରୀ କାବୁ କରିବାକୁ ଚେଷ୍ଟା ବେଳେ ଗୁଳିମାଡ଼ କରି ଫେରାର ହେବାକୁ ଉଦ୍ୟମ କରିଥିଲେ । ଗୁଳିମାଡ଼ରେ କର୍ମଚାରୀ ସୁନିଲ ରାୟ ଓ ଦୀପକ ସାହୁଙ୍କ ଦେହରେ ବାଜିଥିଲା। ଗୁଳି ଫୁଟାଇ ଡକାୟତ ଫେରାର ହେବାକୁ ଦୌଡ଼ୁଥ‌ିବା ବେଳେ ରାସ୍ତାରେ ବାଇକ ଧରି ଆସୁଥ‌ିବା ଗୋଳଇପୁର ପଂଚାୟତ ସୋତି ଗ୍ରାମର ଗୌରାଙ୍ଗ ପଣ୍ଡାଙ୍କ ପୁଅ ନୀଳମାଧବ (୨୨)ଙ୍କୁ ଅଟକାଇ ମୃତ ସୁନୀଲ ରାୟ ବାଇକଟିକୁ ଛଡାଇବାକୁ ଚେଷ୍ଟା କରିଥିଲେ। ହେଲେ ସେ ବିରୋଧ କରିବାରୁ ତାଙ୍କୁ ଗୁଳିମାଡ଼ କରିଥିଲେ। ଫଳରେ ସେ ସେହିଠାରେ ହିଁ ଟଳିପଡ଼ିଥିଲେ। ପିଛା କରୁଥିବା ଲୋକେ ଜଣକୁ କାବୁ କରିନେଇଥିବା ବେଳେ ଜଣ ଦୌଡ଼ି ନିକଟରେ ଥ‌ିବା ଏକ ପୋଖରୀରେ ବୁଡ଼ିଯାଇଥିଲା। ତେବେ ତାକୁ ଲୋକେ ଧରି ଛକକୁ ଆଣି ବହେ ଛେଚିଥିଲେ। ଖବର ପାଇ ପହଁଚିଥିବା ପୁଲିସ ଲୋକଙ୍କ କବଳରୁ ଡ଼କାୟତଙ୍କୁ ଉଦ୍ଧାର କରିବାକୁ ନାକେଦମ ହୋଇଯାଇଥିଲା। ଡ଼କାୟତଙ୍କ ପାଖରୁ
ଗୋଟିଏ ଥଳି ସୁନା ଉଦ୍ଧାର ହୋଇଥିଲା। ଅନ୍ୟପଟେ ଫେରାର ହୋଇଯାଇଥିବା ଡ଼କାୟତ କୁଆଖୁଆ ଥାନା ଅନ୍ତର୍ଗତ ମୃତ ନୀଳମାଧବ ପଣ୍ଡା ଭୋଟକା ଗ୍ରାମର ଜଗବନ୍ଧୁ ସାହୁଙ୍କ ପୁଅ ସଂଜୀବ ସାହୁ ଏକ ଗ୍ଳାମର ବାଇକ (ଓଡି୩୪ ଜେ ୨୧୭୧) କୁ ଫାଙ୍କା ଗୁଳି ଚାଳନା କରି ନେଇ ଫେରାର ହୋଇଯାଇଥିଲା। ଆହତ ସୁନିଲ ଓ ଦୀପକକୁ ପ୍ରଥମେ ପାଣିକୋଇଲିର ଏକ ଘରୋଇ ଚିକତ୍ସାଳୟକୁ ନିଆଯିବା ପରେ ଯାଜପୁର ମୁଖ୍ୟ ଚିକିତ୍ସାଳୟରେ ଭର୍ତି କରାଯାଇଥିଲା। ହେଲେ ଚିକିତ୍ସିତ ଅବସ୍ଥାରେ ସୁନିଲଙ୍କ ମୃତ୍ୟୁ ଘଟିଥିବା ବେଳେ
ଦୀପକଙ୍କୁ ଭୁବନେଶ୍ବର ଏକ ଘରୋଇ ଚିକିତ୍ସାଳୟରେ ଭର୍ତି କରାଯାଇଛି। ମୃତ ନୀଳମାଧବ ବିଦ୍ୟୁତ୍ ବିଭାଗ କର୍ମଚାରୀ ଭାବେ କାର୍ଯ୍ୟରତ ଥିଲେ। ଯାହାକୁ ଯାଜପୁର ମୁଖ୍ୟ ଚିତ୍ସାଳୟରେ ଭର୍ତି କରାଯାଇଥିବା ବେଳେ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ। ମୃତ ସୁନିଲ(୩୫) ଯାଜପୁର ସଦର ଥାନା ଅନ୍ତର୍ଗତ ଭୁବନେଶ୍ଵରପୁର ପଂଚାୟତ କଳସଢିଅ ଗ୍ରାମର ଦେବେନ୍ଦ୍ର ରାମଙ୍କ ପୁଅ ଅଟନ୍ତି। ଗୁରୁତର ଆହତ କୁନିନ୍ଦା ଗ୍ରାମର ମାୟାଧର ସାହୁଙ୍କ ପୁଅ ଦୀପକ (୨୦) ଅଟନ୍ତି । ଗୁରୁତର ଡ଼କାୟତଙ୍କୁ ଗୁରୁତର ଅବସ୍ଥାରେ ପୁଲିସ ଯାଜପୁର ମୁଖ୍ୟ ଚିତ୍ସାଳୟରେ ଭର୍ତି କରାଯାଇଥିଲା। ତେବେ ସେମାନଙ୍କ ଅବସ୍ଥା ଗୁରୁତର ଥିବାରୁ କଟକ ବଡ଼ ମେଡ଼ିକାଲକୁ ସ୍ଥାନାନ୍ତର କରାଯାଇଛି। ତେବେ ପାଣିକୋଇଲି ଥାନା ଠାରୁ ମାତ୍ର ୨ ଶହ ମିଟର ଏବଂ ଏସପି ଦପ୍ତର ଠାରୁ ମାତ୍ର ୩ଶହ ମିଟର ଦୂରରେ ଡ଼କାୟତି ଏବଂ ଗୁଳିମାଡ଼ ଭଳି ଘଟଣାକୁ ନେଇ ପ୍ରବଳ ଉତେଜନା ପ୍ରକାଶ ପାଇଥିଲା। ପରିସ୍ଥିତି ଅଣାୟତ ହେବାରୁ ଘଟଣା ସ୍ଥଳରେ ବହୁ ସଂଖ୍ୟାର ପୁଲିସ ମୁତୟନ ହୋଇଥିଲେ। ଯାଜପୁର ଏସପି ୟସ ପ୍ରତାପ ଶ୍ରୀମଲ ଓ ଡିଆଇଜି ଚରଣ ସିଂହ ମୀନା ପହଁଚି ଲୋକଙ୍କୁ ବୁଝାସୁଝା କରିଥିଲେ। ଡକାୟତଙ୍କ ପରିଚୟ ପୁଲିସ ପ୍ରଦାନ କରିନଥିବା ବେଳେ କେହି ଝାଡ଼ଖଣ୍ଡ, ତ କେହି ରୋହିଙ୍ଗିଆ ବାଂଲାଦେଶୀ ବୋଲି କୁହାକୁହି ହେଉଛନ୍ତି । ପୁଲିସ ତଦନ୍ତ ପରେ ପ୍ରକୃତରେ ଡ଼କାୟତି କରିବାକୁ କେତେଜଣ ଆସିଥିଲ ଏବଂ ସେମାନଙ୍କ ପରିଚୟ ସ୍ପଷ୍ଟ ହେବ।