ଆଙ୍କୁଲାଚ଼ଟିରେ ସପ୍ତଦୋଳ ମେଳଣ ସମାପନ

ଚିଲିକା:ଖୋର୍ଦ୍ଧା ଜିଲ୍ଲା ଚିଲିକା ବ୍ଲକ ଆଙ୍କୁଲାଚଟି ସପ୍ତଦୋଳ ମେଳଣ ପଡ଼ିଆରେ ଅନୁଷ୍ଠିତ ହୋଇଯାଇଅଛି ପ୍ରସିଦ୍ଧ ସପ୍ତଦୋଳ ମେଳଣ । ପୌରାଣିକ ତଥା ଐତିହାସିକ ଶୋଲରି ପାହାଡ଼ର ପାଦଦେଶରେ କାହିଁ କେଉଁ କାଳରୁ ପାଳନ ହୋଇ ଆସୁଛି ଏହି ସପ୍ତଦୋଳ ମେଳଣ ଯାତ୍ରା। ଦୈତ୍ୟରାଜ ବାଣାସୁରର ତପସ୍ୟା ସ୍ଥଳୀ ଶୋଲରି ଶାମୁକା ସ୍ଥଳୀର ପାଦଦେଶରେ ପାଳିତ ହେଉଥିବା ଏହି ଯାତ୍ରା ଉତ୍ସବ ମହାସମାରୋହରେ ପଞ୍ଚୁପଲ୍ଲୀ ସୀମା ଗ୍ରାମବାସୀ ମାନଙ୍କ ଦ୍ଵାରା ପରିଚାଳିତ ହୋଇଥାଏ। ଚଳିତ ବର୍ଷ ଦର୍ଶକଙ୍କ ସମାଗମ ବେଶ୍ ପରିଲକ୍ଷିତ ହୋଇଥିବାର ଦେଖାଯାଇ ଥିଲା। ସପ୍ତମୀ ଦିନ ରାତ୍ରୀରେ ମାହେନ୍ଦ୍ର ବେଳା ରେ ଗାଦିଶ୍ୱର ଶ୍ରୀ ଶ୍ରୀ ବାଲୁଙ୍କେଶ୍ବର ଦେବଙ୍କ ନିମନ୍ତ୍ରଣ କ୍ରମେ ମୁଖ୍ୟ ଅତିଥି ଭାବରେ ଆସୁଥିବା ଶ୍ରୀ ଶ୍ରୀ କଳିଯୁଗେଶ୍ୱର ମହାଦେବ ପାଟ ପଟୁଆର ସହିତ ଆସିଥିଲେ। ଶ୍ରୀ ଶ୍ରୀ ବାଲୁଙ୍କେଶ୍ବର ଦେବଙ୍କ ଠାରୁ ଆଜ୍ଞାମାଳ ନେଇ ଶ୍ରୀ ଶ୍ରୀ କଳିଯୁଗେଶ୍ୱର ଦେବଙ୍କୁ ପାଛୋଟି ଆଣିଥିଲେ କମିଟିର ସଂପାଦକ ଓ ସଦସ୍ୟ ବୃନ୍ଦ । ଉଭୟ ଠାକୁର ନିଜନିଜ ଆସନରେ ଉପବେସନ କରିବା ପରେ ଅନ୍ୟ ଠାକୁର ମାନେ ଯଥାରୀତି ନିଜ ନିଜର ଆସନ ଅଳଙ୍କୃତ କରିଥିଲେ। ଗାଦିଶ୍ୱର ଶ୍ରୀ ଶ୍ରୀ ବାଲୁଙ୍କେଶ୍ବର ଦେବ ଙ୍କ ନିମନ୍ତ୍ରଣ କ୍ରମେ ଶ୍ରୀ ଶ୍ରୀ କଳିଯୁଗେଶ୍ୱର ଦେବ , ବାଣପୁରର ଅଧିଷ୍ଠାତ୍ରୀ ଦେବୀ ମା ଭଗବତୀଙ୍କ ଆଜ୍ଞାମାଳ, ଶ୍ରୀ ଶ୍ରୀ ସୀଙ୍ଗିନାଥ ଦେବ ସିଙ୍ଗେଶ୍ୱର, ଶ୍ରୀ ଶ୍ରୀ କୁଞ୍ଜବିହାରୀ ଦେବ ସିଙ୍ଗେଶ୍ୱର,ଶ୍ରୀ ଶ୍ରୀ କୁଞ୍ଜବିହାରୀ ଦେବ ସିଙ୍ଗେଶ୍ୱର ମଠ ଠାକୁର, ଶ୍ରୀ ଶ୍ରୀ ଲକ୍ଷ୍ମୀନାରାୟଣ ଦେବ ପାଇକକୁଷଡିହ, ଶ୍ରୀ ଶ୍ରୀ ଗୋପିନାଥ ଦେବ ପ୍ରଣଦେଇପୁର, ଶ୍ରୀ ଶ୍ରୀ ଜଳେଶ୍ଵର ଦେବ ଖଣ୍ଡୁଆଳକୋଟ,ଶ୍ରୀ ଶ୍ରୀ ଗୋପାଳଜୀଉ ଦେବ ଧୁଆଁଳ, ଶ୍ରୀ ଶ୍ରୀ ରାଧାମୋହନ ଦେବ ପାଇକକୁଷଡିହ,ଶ୍ରୀ ଶ୍ରୀ ରାଧାମୋହନ ଦେବ କୋତରୀ,ଶ୍ରୀ ଶ୍ରୀ ରାଧାମୋହନ ଦେବ ବିଷ୍ଣୁଡ଼ିହ,ଶ୍ରୀ ଶ୍ରୀ ରାଧାମୋହନ ଦେବ ପାରିକଂସାରୀ,ଶ୍ରୀ ଶ୍ରୀ ରାଧାମୋହନ ଦେବ କୁମାଣ୍ଡୋଳ , ଶ୍ରୀ ଶ୍ରୀ ଦଧିବାମନ ଦେବ ଦାମୋଦର ପୁର, ଶ୍ରୀ ଶ୍ରୀ ଗୋପିନାଥ ଦେବ ବ୍ରାହ୍ମଣକୁଷଡିହ, ଶ୍ରୀ ଶ୍ରୀ ପାର୍ବତୀ ଦେବୀ ବ୍ରାହ୍ମଣକୁଷଡିହ, ଶ୍ରୀ ଶ୍ରୀ ବୃନ୍ଦାବନଚନ୍ଦ୍ର ଦେବ ସାମନ୍ତସିଂହାର ପୁର, ଶ୍ରୀ ଶ୍ରୀ ସୋମନାଥ ଦେବ ରାହାଣବେଲି, ଶ୍ରୀ ଶ୍ରୀ ଗୁପ୍ତେଶ୍ୱର ଦେବ ରଘୁନାଥପୁର,ଶ୍ରୀ ଶ୍ରୀ ଗିରିଧାରୀ ଦେବ ରାହାଣବେଲି ଠାକୁର ଉପବେଶନ ହୋଇଥିଲେ। ପ୍ରାୟତଃ ଗ୍ରାମବାସୀ ଠାକୁର ମାନଙ୍କୁ ବେଶ୍ ଭଲ ଭାବରେ ସୁସଜ୍ୱିତ କରି ପାଟ ପଟୁଆର ସହିତ ଆସିଥିଲେ। ଲାଗୁଥିଲା ସତେ ଯେମିତି ସ୍ଵର୍ଗରୁ ଦେବତା ମାନେ ଏଠାରେ ଅବସ୍ଥାପିତ ହୋଇ ଦେବସଭା କରୁଛନ୍ତି। ସିଖରପଦର ଗ୍ରାମବାସୀଙ୍କ ତତ୍ତ୍ଵାବଧାନରେ ଓ ସହଯୋଗରେ ଏ ବର୍ଷର ଏହି ସପ୍ତଦୋଳ ଯାତ୍ରା ଉତ୍ସବରେ ଦିନ ତମାମ ଶ୍ରଦ୍ଧାଳୁଙ୍କ ମନୋରଂଜନ ନିମିତ୍ତ ଖାସ୍ କରି ରାମ ନାଟକ ପରିବେଷଣ କରାଯାଉଅଛି। ଭକ୍ତି ଭାବ ଧାରାକୁ ଅକ୍ଷତ ରଖିବାକୁ ଏହି ପ୍ରୟାସ ରାତ୍ରି ପ୍ରାୟ ଦଶଟା ପର୍ଯ୍ୟନ୍ତ ଚାଲିବ। ତେବେ ସପ୍ତଦୋଳ ମେଳଣ ଅପରାହ୍ନ ପାଞ୍ଚଟାରେ ବେଶ୍ ଶାନ୍ତି ଶୃଙ୍ଖଳାର ସହିତ ସମାପ୍ତ ହୋଇଥିବା ବେଳେ ଠାକୁର ମାନଙ୍କର ବିଦାୟ ମେଲାଣି ବହୁତ ମନଲୋଭା ହୋଇଥିଲା। ୨୨ ବିମାନ ଓ ଚଉଦଳରେ ବିରାଜ ମାନ ଠାକୁର ମାନେ ବିଦାୟ ମେଲାଣି ମାଗି ଯିବାର ଦୃଶ୍ୟ ଅତ୍ୟନ୍ତ ମନୋରମ ଓ ହୃଦସ୍ପର୍ଶୀ ଥିଲା। ସାତ ଘେରା ମେଲଣ ସରିବା ପରେ ଗାଦିଶ୍ୱର ଶ୍ରୀ ଶ୍ରୀ ବାଲୁଙ୍କେଶ୍ବର ଦେବଙ୍କ ଠାରୁ ଜଣକପରେ ଜଣେ ଠାକୁର ଆସନ୍ତା ବର୍ଷ କୁ ଏକାଠି ହେବାକୁ ବିଦାୟ ନେଇ ଫେରିଯାଇଥିଲେ ପୁଣି ବର୍ଷକର ଅପେକ୍ଷାରେ। ଭକ୍ତଙ୍କ ଠାକୁର , କିଛି ଦିନର ଲୀଳା କରି ଫେରିଯିବେ ନିଜ ନିଜର ମନ୍ଦିରକୁ। ପଞ୍ଚୁପଲ୍ଲୀ ସୀମା ସପ୍ତଦୋଳ କମିଟି ଓ ଶିଖରପଦର ଗ୍ରାମବାସୀଙ୍କର ମିଳିତ ସହଯୋଗରେ ସପ୍ତଦୋଳ ଯାତ୍ରା ବେଶ୍ ଶାନ୍ତି ଶୃଙ୍ଖଳାର ସହିତ ସମ୍ପାଦନ ହୋଇଥିବା ଜଣାଯାଇଛି।ବାଲୁଗାଁ ଥାନା ଅଧିକାରୀ ଜୟପ୍ରକାଶ ପରିଡ଼ା,ପୋଲିସ୍ ବାହିନୀ ଓ ବାଲୁଗାଁ ଏସ ଡ଼ି ପି ଓ ସଞ୍ଜୟ କୁମାର ପଟ୍ଟନାୟକଙ୍କ ପ୍ରତ୍ୟେକ୍ଷ ତତ୍ତ୍ଵାବଧାନରେ ଶାନ୍ତି ଶୃଙ୍ଖଳା ରକ୍ଷା କରାଯାଇଥିବା ବେଳେ ସାଧାରଣ ପ୍ରଶାସନ ବିଭାଗ ,ଅଗ୍ନିଶମ ବିଭାଗ,ସ୍ଵାସ୍ଥ୍ୟ ବିଭାଗ, ବିଦ୍ୟୁତ୍ତ ବିଭାଗ ପକ୍ଷରୁ ସମ୍ପୂର୍ଣ୍ଣ ଭାବରେ ସହଯୋଗ ପ୍ରଦାନ କରାଯାଇଥିଲା ।