ମଧ୍ୟପ୍ରାଚ୍ୟରେ ଊଗ୍ର ହେଉଛି ମହାଯୁଦ୍ଧ

ମଧ୍ୟପ୍ରାଚ୍ୟରେ ଯୁଦ୍ଧର ଘନଘଟା ବନ୍ଦ ହେବାର ନା ନେଉନି । ଇରାନ ଉପରେ ଇସ୍ରାଏଲ ଓ ଆମେରିକା ଜୋରଦାର ଆକ୍ରମଣ କରୁଛନ୍ତି । ଇରାନ ମଧ୍ୟ ତାହାର ପାଲଟା ଆକ୍ରମଣ ଜାରୀ ରଖିଛି । ମଧ୍ୟପ୍ରାଚ୍ୟ ଯୁଦ୍ଧ ମଧ୍ୟରେ ୨ଟି ତୈଳ ଟ୍ୟାଙ୍କର ଉପରେ ପୁଣି ହମଲା କରିଛି ଇରାନ । ଆକ୍ରମଣର ଶିକାର ହୋଇଥିବା ଗୋଟିଏ ଜାହାଜ ଆମେରିକା ସହ ଜଡ଼ିତ । ଇରାକ ଉପକୂଳ ଠାରୁ ସାମାନ୍ୟ ଦୂରରେ ଇରାନ ତୈଳ ଟ୍ୟାଙ୍କରକୁ ଟାର୍ଗେଟ କରିଥିବା ବେଳେ ଏଥିରେ ଜଣେ ଭାରତୀୟଙ୍କ ମୃତ୍ୟୁ ହୋଇଛି । ଏହାକୁ ନେଇ ଇରାନ, ଇସ୍ରାଏଲ ଓ ଆମେରିକା ମଧ୍ୟରେ ଚାଲିଥିବା ଯୁଦ୍ଧ ଆହୁରି ତୀବ୍ର ହୋଇଛି । ଷ୍ଟ୍ରେଟ ଅଫ ହର୍ମୁଜ ଦେଇ ଗୋଟିଏ ଲିଟର ତେଲ ଛଡ଼ା ଯିବ ନାହିଁ ଇରାନ କହିବା ପରେ ପ୍ରଥମ ଥର ପାଇଁ ସିଧାସଳଖ କୌଣସି ତୈଳ ଟ୍ୟାଙ୍କର ହମଲା କରିଛି । ମିଳିଥିବା ସୂଚନା ଅନୁସାରେ, ଇରାକ ଅଧିକୃତ ଜଳରେ ଥିବା ଖୋର ଅଲ ଜୁବୈର ପୋର୍ଟ ନିକଟରେ ଇରାନ ଆମେରିକୀୟ କମ୍ପାନୀର ମାଲିକାନା ତଥା ମାର୍ଶଲ ଦ୍ୱୀପପୁଞ୍ଜର ପତାକା ଲାଗିଥିବା ତୈଳ ବୋଝେଇ ଟ୍ୟାଙ୍କରକୁ ଟାର୍ଗେଟ କରିଛି । ସେଫ ସି ବିଷ୍ଣୁ ନାମକ ଏହି ଜାହାଜ ଉପରେ ଇରାନ ଆତ୍ମଘାତୀ ଡଙ୍ଗା ଦ୍ୱାରା ଆକ୍ରମଣ କରି ଧ୍ୱଂସ କରିଛି । ଏଥିଯୋଗୁ ଜଣେ ଭାରତୀୟଙ୍କ ମୃତ୍ୟୁ ହୋଇଛି । କିନ୍ତୁ ତାଙ୍କ ପରିଚୟ ସାର୍ବଜନୀନ ହୋଇନି ।ଭାରତୀୟ ଜଣଙ୍କ ସେଫ ସି ଜାହାଜରେ ରହିଥିଲେ । ଘଟଣା ପରେ ଜାହାଜରେ ଥିବା ବାକି ୨୭ ଜଣ କ୍ରୁ ସଦସ୍ୟ ଓ କର୍ମଚାରୀଙ୍କୁ ଉଦ୍ଧାର କରି ଇରାକର ବାସ୍ରା ସହରକୁ ନିଆଯାଇଥିବା ଜଣାପଡ଼ିଛି । ସାମ୍ନାକୁ ଆସିଥିବା ଭିଡିଓରେ ଦେଖିବାକୁ ମିଳୁଛି ଯେ ଶକ୍ତିଶାଳୀ ବିସ୍ଫୋରଣ ପରେ ୨ଟି ଯାକ ତୈଳ ଟ୍ୟାଙ୍କରରେ ନିଆଁ ଲାଗି ଯାଉଛି । ଗୋଟିଏ ଜାହାଜରେ ମାର୍ଶଲ ଦ୍ୱୀପପୁଞ୍ଜ ଓ ଅନ୍ୟ ଗୋଟିଏ ଜାହାଜରେ ମାଲଟୀୟ ପତାକା ଲାଗିଛି । ମାର୍ଶଲ ପତାକା ଲାଗିଥିବା ଜାହାଜ ଗୋଟିଏ ଆମେରୀୟକ କମ୍ପାନୀର । ସେହିପରୀ ମାଲଟା ପତାକା ଲାଗିଥିବା ଜାହାଜର ମାଲିକାନା ଗ୍ରୀସ ଭିତ୍ତିକ କମ୍ପାନୀ ପାଖରେ ରହିଥିଲା । ବିସ୍ଫୋରଣ ଓ ଅଗ୍ନିକାଣ୍ଡ ଯୋଗୁ ପୂରା ଅଞ୍ଚଳ ଧୂଆଁମୟ ହୋଇଥିଲା । ଦୁଇଟି ଟ୍ୟାଙ୍କର୍ସ ପ୍ରାୟ ୪ ୦୦,୦୦୦ ବ୍ୟାରେଲ ଇରାକର ଅଶୋଧିତ ତୈଳ ରହିଥିଲା । ହେଲେ ଆକ୍ରମଣ ଯୋଗୁ ଏତେ ପରିମାଣର ଅଶୋଧିତ ତୈଳ ନଷ୍ଟ ହୋଇଯାଇଛି ।ଭାରତର ମଧ୍ୟପ୍ରାଚ୍ୟ କୂଟନୀତିକ କାମ ଦେଇଛି । ଗୁରୁବାର ଭାରତୀୟ ତୈଳ ଟ୍ୟାଙ୍କରଗୁଡ଼ିକ ପାଇଁ ଗୁରୁତ୍ୱପୂର୍ଣ୍ଣ ହର୍ମୁଜ ପ୍ରଣାଳୀକୁ ଖୋଲି ଦେଇଛି ଇରାନ । ଇସ୍ରାଏଲ- ଆମେରିକା ସହ ଯୁଦ୍ଧ ଯୋଗୁ ଇରାନ ପକ୍ଷରୁ ହର୍ମୁଜ ପ୍ରଣାଳୀକୁ ବନ୍ଦ କରି ଦିଆଯାଇଥିଲା । ଏଥିଯୋଗୁ ଭାରତ ଆସିବାକୁ ଥିବା ଜାହାଜ ଗୁଡ଼ିକ ମଧ୍ୟ ତେଲ ଓ ଅନ୍ୟାନ୍ୟ ଜିନିଷ ଧରି ହର୍ମୁଜ ପ୍ରଣାଳୀ ସୁରକ୍ଷିତ ଭାବେ ଅତିକ୍ରମ କରିବାକୁ ସକ୍ଷମ ହେଉଛନ୍ତି । ସ୍ଥିତି ଦିନକୁ ବିଗୁଡ଼ୁ ଥିବାରୁ ଭାରତର ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର ମଧ୍ୟପ୍ରାଚ୍ୟ ଯୁଦ୍ଧ ମଧ୍ୟରେ ତାଙ୍କ ଇରାନୀୟ ପ୍ରତିପକ୍ଷ ଆବ୍ୱାସ ଅରାଘଚିଙ୍କ ସହ କଥା ହୋଇଥିଲେ । ଭାରତୀୟ ଜାହାଜ ପାଇଁ ହର୍ମୁଜ ପ୍ରଣାଳୀ ଇରାନ ଖୋଲିବାକୁ ସେ କହିଥିଲେ । ଆବ୍ୱାସଙ୍କ ସହ କଥା ହେବା ପରେ ଭାରତୀୟ ଜାହାଜଗୁଡ଼ିକ ପାଇଁ ଇରାନ ହର୍ମୁଜ ଜଳପଥ ଖୋଲି ଦେଇଛି ।ଏହାପରେ ହର୍ମୁଜ ଜଳପଥ ଦେଇ ସୁରକ୍ଷିତ ଭାବେ ଗୋଟିଏ ତୈଳ ବୋଝେଇ ଜାହାଜ ମୁମ୍ବାଇରେ ପହଞ୍ଚିଥିବା ଜଣାପଡ଼ିଛି । ମଧ୍ୟପ୍ରାଚ୍ୟ ଯୁଦ୍ଧ ମଧ୍ୟରେ ଭାରତର ଶକ୍ତି ଯୋଗାଣ ଯେମିତି ଅତୁଟ ରହିବ, ସେବିଷୟରେ ଉଭୟ ନେତା ଆଲୋଚନା କରିଥିବା ଜଣାପଡ଼ିଛି ।ଷ୍ଟ୍ରେଟ ଅଫ ହର୍ମୁଜ ହେଉଛି ବିଶ୍ୱର ଅନ୍ୟତମ ପ୍ରମୁଖ ଜଳପଥ । ଏହି ରାସ୍ତାରେ ବିଶ୍ୱର ଅଧିକାଂଶ ଅଶୋଧିତ ତୈଳ ଓ ପ୍ରାକୃତିକ ଗ୍ୟାସ ପରିବହନ ହୋଇଥାଏ । ହେଲେ ଆମେରିକା ଓ ଇସ୍ରାଏଲ ସହ ଯୁଦ୍ଧ ଯୋଗୁ ଇରାନ ଏହି ରାସ୍ତାକୁ ବନ୍ଦ କରିଦେଇଥିଲା । ସେହିପରି ଏହି ରାସ୍ତା ଅତିକ୍ରମ କରିବା ପାଇଁ ଚେଷ୍ଟା କରୁଥିବା କିଛି ଜାହାଜ ଉପରେ ଇରାନ ମଧ୍ୟ ହମଲା କରିଥିଲା । ଆକ୍ରମଣ ଭୟରେ ଭାରତ ଆସୁଥିବା ଜାହାଜଗୁଡ଼ିକ ମଧ୍ୟ ହର୍ମୁଜ ପ୍ରଣାଳୀ ଅତିକ୍ରମ କରିପାରି ନଥିଲେ । ଫଳରେ ଭାରତରେ ଗ୍ୟାସ ଓ ତୈଳ ସଙ୍କଟ ସୃଷ୍ଟି ହେବାର ଆଶଙ୍କା ପ୍ରକାଶ ପାଇଥିଲା । ଏହାକୁ ଦୃଷ୍ଟିରେ ରଖି ଜୟଶଙ୍କର ନିଜର ଇରାନ ପ୍ରତିପକ୍ଷଙ୍କ ସହ କଥା ହୋଇଛନ୍ତି । ଅଶୋଧିତ ତୈଳ ଓ ଏଲପିଜି ଯେମିତି ସମୁଦ୍ର ପଥରେ ସୁରକ୍ଷିତ ଭାବେ ଭାରତରେ ପହଞ୍ଚି ପାରିବ, ସେକଥା ଇରାନକୁ ନିଶ୍ଚିତ କରିବାକୁ ମଧ୍ୟ ଜୟଶଙ୍କର କହିଛନ୍ତି । ତାଙ୍କ କଥାରେ ମଧ୍ୟ ଇରାନ ରାଜି ହୋଇ ହର୍ମୁଜ ପ୍ରଣାଳୀ ଭାରତୀୟ ଜାହାଜଗୁଡ଼ିକ ପାଇଁ ଖୋଲି ଦେଇଛି । ଇରାନୀୟ ଅଧିକାରୀମାନେ ଭାରତ ପାଇଁ ଅନୁକମ୍ପ ଦେଖାଇଥିଲେ ହେଁ ଆମେରିକା, ୟୁରୋପ ଓ ଇସ୍ରାଏଲ ସହ ଜଡ଼ିତ ଜାହାଜଗୁଡ଼ିକ ପାଇଁ ପୂର୍ବଭଳି ହର୍ମୁଜ ଜଳପଥ ବନ୍ଦ ରହିଛି । ସମାନ ପ୍ରସଙ୍ଗରେ ଜୟଶଙ୍କର ରୁଷ ଓ ଫ୍ରାନ୍ସ ସହ ମଧ୍ୟ କଥା ହୋଇଛନ୍ତି । ଇରାନର ଅନୁମତି ପରେ ପ୍ରଥମ ପର୍ଯ୍ୟାୟରେ ଲିବିୟା ପତାକା ଲାଗିଥିବା ଗୋଟିଏ ଅଶୋଧିତ ତୈଳ ବୋଝେଇ ଟ୍ୟାଙ୍କର ଭାରତର ମୁମ୍ବାଇ ପୋର୍ଟରେ ପହଞ୍ଚିଛି । ଝଷରଦ୍ଭକ୍ଷକ୍ଟଦ୍ଭଶ ଝଙ୍କରଚ୍ଛଜ୍ଞବଙ୍ଘ ନାମକ ଜାହାଜଟି ସାଉଦି ଆରବର ରାସ ତାନୌର ପୋର୍ଟରୁ ତେଲ ଧରି ଭାରତ ଅଭିମୁଖ୍ୟ ମାର୍ଚ୍ଚ ୧ରେ ବାହାରିଥିଲା । କିଛି ଦିନ ହର୍ମୁଜ ନିକଟରେ ଅଟକିବା ପରେ ଏବେ ଏହା ସୁରକ୍ଷିତ ଭାବେ ଉକ୍ତ ଜଳପଥ ଦେଇ ଭାରତରେ ପହଞ୍ଚିଛି । ଅନ୍ୟପଟରେ ମଧ୍ୟପ୍ରାଚ୍ୟରେ ଚାଲିଥିବା ମହାଯୁଦ୍ଧ ଆଜି ୧୩ତମ ଦିନରେ ପ୍ରବେଶ କରିଛି । ଇସ୍ରାଏଲ ଓ ଆମେରିକା ମିଳିତ ଭାବେ ଇରାନ ଉପରେ ହମଲା କରୁଥିବା ବେଳେ ତେହରାନ ମଧ୍ୟ ଏହାର ପାଲଟା ଜବାବ ଦେବା ବନ୍ଦ କରିନାହିଁ । ଆମେରିକା ଉପରେ ସିଧାସଳଖ ହମଲା କରିବାରେ ବିଫଳ ହୋଇଥିବା ଇରାନ ମଧ୍ୟପ୍ରାଚ୍ୟରେ ଥିବା ୱାଶିଂଟନର ବିଭିନ୍ନ ବେସକୁ ଟାର୍ଗେଟ କରୁଛି । ସେହିପରି ବିଶ୍ୱ ବାଣିଜ୍ୟର ପ୍ରମୁଖ ଜଳମାର୍ଗ ହର୍ମୁଜକୁ ବନ୍ଦ କରି ଇରାନ ପୂରା ବିଶ୍ୱର ନିଦ ହଜାଇ ଦେଇଛି । ଆମେରିକା ଓ ଇସ୍ରାଏଲ ତୁଳନାରେ ଇରାନ ଅତ୍ୟନ୍ତ ଦୁର୍ବଳ ।